Já þannig er nú það prófið verður á föstudaginn. Ég var sú eina sem vildi ekki hafa það þá svo ég varð að gefa mig. Það kostaði mig samt 5600 kr að breyta flugfarinu, en bekkurinn minn safnaði 2290 kr til þess að ég myndi skrifa undir breytinguna á prófinu. Helgin verður því frekar dýr... 10.000 kr dagurinn til þess að hitta Hjalta Það verður nú samt vel þess virði. En svo nú er ég að strita við að læra fyrir próf sem ég hef varla tíma í þar sem það er meira en nóg að gera í hinum tveim áföngunum, en ég verð bara að lenda á eftir núna, hlýt að ná því upp í næstu viku.

Annars get ég sagt ykkur frá því að ég fékk mér ný gleraugu um daginn. Er s.s. komin með svolítið verri sjón og smá sjónskekkju og sé ég miklu betur núna. Vonandi fer ég nú að hætta að versna svo ég verði ekki orðin blind eftir nokkur ár.

Helgin var svo alveg frábær. Borðaði helling og hafði það náðugt. Pabbi er nýbúinn að kaupa sér heimabíó og sjónvarp og var bíó á föstudags og laugardagskvöldinu. Rosalega flott. Miklu betra heldur en háskólabíó alla vegana!

En nú ætla ég að fara að haska mér áfram. Þarf að ná að lesa einn kafla í viðbót fyrir svefninn Góða nótt...

Þannig er nú það að næsta fimmtudag á ég pantað flug norður, þar sem ég ætlaði að fara til Hjalta. Á að vera frí í skólanum á föstudaginn, en nú eru bekkjafélagarnir að reyna að fá að halda eðlisfræðiprófið þá, sem ég by the way er búin að ná að planta á miðvikudaginn. Ég er svo ans... fúl yfir þessu að ég kom sjálfri mér á óvart hversu ákveðin/frek ég get verið Á morgun kemur þetta samt allt saman í ljós, en vonandi fer þetta mér í hag.

Á morgun ætla ég að fara á Blönduós en um síðustu helgi komst ég ekki vegna veðurs. Ætla því að drífa mig núna þar sem við verðum næstum því öll fjölskyldan. Er orðin rosalega spennt yfir því að hitta fjölskylduna en þó sérstaklega Sigurgeir því ég hef ekki séð hann síðan í september. Hann er reyndar að koma norður til þess að fara í jarðarför, en vinur hans dó um daginn. Hræðilegt

Var loksins dugleg og drattað mér í baðhúsið áðan. Ég var eiginlega búin að gleyma hversu gott það er að vera að drepast úr líkamlegri þreytu. Eitthvað annað en vanalega þar sem andlega hliðin er venjulega alveg búin á því.

Er farin að halda að fólk geti fengið hausverk á því að hugsa of mikið. Allt of mikið álag á heilann þessa dagana

Ég er farin að hugsa allt of mikið til jólanna og ég virkilega get ekki beðið eftir að komast í frí. Hitta alla, eyða einhverjum tíma með Hjalta og bara slappa af og gera eitthvað sem ég gef mér ekki tíma í þessa dagana. Annars þarf ég bara að þrauka fram í miðjan febrúar, en þá tekur við eitthvað aðeins eðlilegri törn, sem er þó örugglega erfið en kannski ekki alveg svona brjálað

Sigríður Katrín kom til mín í dag og var að hlægja að því að fjölskyldan hennar væru einu sem kommentuðu. Er farin að halda að einu manneskjurnar sem lesi þetta séu Sibba og afleggjarar Gott að einhver nennir að fylgjast með mér, því ekki er það fjölskyldan mín sem les þetta

Hlakka annars til að hitta ykkur öll um jólin. Ætla að eyða nokkrum dögum á Akureyri fyrir jól til þess að fara í heimsóknir og hafa það náðugt hjá henni móður minni

En ætla að fara að reikna eðlisfræði og pakka svo niður fyrir morgun daginn.

Kv. Dagrún heilabrjótur...

Í morgun rölti ég af stað í skólann með nýju þykku húfuna mína og í úlpu með vettlinga. Hugsaði með mér hvað veðrið væri yndislegt. Logn, smá snjór og niðamyrkur enn þá... Þetta var svo góð byrjun á deginum. Þegar ég var komin út í skóla og sagði einlægt (í alvörunni) að það væri svo yndislegt veður voru viðbrögðin misjöfn. Flestir voru nú ekki sammála, enmér finnst snjórinn persónulega alveg yndislegur miðað við þessa helvítis rigningu alla daga Skóli til klukkan að verða tuttugu mínútur í sex og þá er orkan alveg búin! Drösla mér heim...þ,e.a.s. fæ far með henni Svövu og nú ætla ég að vera í pásu til sjö og fá mér þá að borða, því ég, Helgi og Svava ætlum að fara að læra saman klukkan hálfátta. Það tók mig svona fimm mínútur að ákveða mig hvað ég ætlaði að gera þessar fáu mínútur sem ég væri í pásu... Held ég kunni varla enn þá að finna mér eitthvað að gera... svo auðvitað endaði ég í tölvunni. Ákvað reyndar að ná í efni á netinu sem auðvitað tengist náminu, en þá fékk ég þessar snilldar pásuhugmynd...að blogga... Það sem maður er orðinn sýrður En ekki meira um það. Mamma fór heim í gær og núna eru bara tveir dagar í að ég fari á Blönduós. Það er voðalega góð tilfinning þó að ég sé nú alveg að verða búin að venjast þvi að búa ein... en þar er ekki tekið með að sofa ein sem mér finnst alveg ótrúlega skrítið. Tekur mig heilu tímana að sofna þegar ég er ein. Nú ætla ég að fara að hafa til matinn. Fajitas kökur með hakki, sveppum og lauk ásam rjómaosti og salsasósu allt grillað í ofninum...mmmm Kv. Dagrún Endilega kommentið það er svo gaman að sjá hverjir eru að líta hérna við. Inga: Ég verð því miður fyrir norðan helgina sem þú kemur. Við reynum bara að hittast næst þegar þú kemur eða kannski næst þegar þú flytur

Góðan daginn...

Af mér er allt ágætt að frétta. Það gekk rosalega vel í lífrænu efnafræðinni líka, en ég fékk út úr henni í síðustu viku. Gengur ekki alveg eins vel núna þar sem það er alveg hlaupið í gegnum efnið og ég er ekki alveg að ná að halda í við það. Allt of mikið efni á stuttum tíma og er ég búin að komast að því hvað er meint með að læknisfræði sé MJÖG erfitt nám, því þetta er bara strit og púl núna og sveiflast maður mikið á milli þess að vera jákvæður fyrir þessu öllu og aðra dagana er maður alveg að gefast upp.

En í gær kom mamma til mín og ætlum við að bralla eitthvað skemmtilegt um helgina. Hún sér nú samt kannski ekkert svo mikið af mér, en þó eitthvað. Ætla svo að reyna að kaupa hluta og helst allar jólagjafirnar á morgun... hóst hóst gangi mér vel að klára það! En um næstu helgi er ég að hugsa um að fara á Blönduós til pabba og loka mig inni yfir daginn, en fara svo til ömmu og afa og Árnýjar og co á kvöldin og svona í pásunum mínum að eyða deginum með fjölskyldunni!

Fór í mat til Árna Þórs og Arndísar í gær og þegar ég ætlaði að segja þeim eitthvað áhugavert um námið komu bara endalaus latnesk orð út úr mér og auðvitað skildu þau varla upp né niður um hvað ég var að tala. Maður er farinn að einangrast frá umheiminum, með óskiljanlegum orðaforð...lækna- og sjúkraþjálfunarnemar og svo aðrir í umheiminum

En þessi færsla er nú farin að minna á eitthvað bull svo það er best að ég hætti þessu og reyni að læra aðeins meira áður en ég fer í fjórfaldan eðlisfræðitíma